Festivali

Sisimiuni aasaanerani immikkut alutornartumik aaqqissuussisoqartalernissaa siunertaralugu tupersuaq atorlugu nipilersornermik festival aallartinneqarnikuuvoq.

Innuttaasut nuannersumik alutornartumillu misigisaqartinneqarnissaata saniatigut anguniarparput illoqarfipput aasaanerani avataaniit festivalimut peqataajartortunit tikerarneqarnerulernissaa, soorlu Aasianni Nipiaa Rockfestivalimut, Nuummilu Akisuanerit festivalimut sineriammiit inuppassuit peqataajartorlutik tikerartartut.  

Tupersuaq immikkuullarissuuvoq nunatsinni assigineqanngitsoq, nipimik pitsaasumik kusanartunillu qullilersorneqarnissaminut periarfissagissaarnini pissutigalugu nuannersumik tusarnaarianit misigisaqarfiusartoq. Taamaattumik upperaarput tupersuaq atorlugu festivali tassaalersinnaasoq Sisimiut ilisarnaataasa pingaarutillit ilaat, soorlu Arctic Circle Race taamatut inissisimalersimasoq. Allaammi festival tassaalersinnaavoq Kalaallit Nunaata ”Roskilde festivalia”. 

Tupersuaq kommunimiit pigineqarpoq napparneqartarlunilu. Aaqqissuussinerli  namminneq kajumissutsiminnik akissarsiaqaratik suliaqartuniit ingerlanneqarpoq. Aaqqissuussinermilu aningaasartuutit tamarmik, soorlu nipilersortut aningaasarsiaat angalanerallu il.il.  aaqqissuisuniit (festivalkomite) akilerneqartarlutik.

Aaqqissuussinermilu aningaasartuuterpassuaqartarpugut tamatigullu qulakkeersinaaneq ajorlutigu aaqqissuussinermi aningaasartuutigut ilumut matussusersinnaanerlutigit.

Taamaattumik Sisimiut festivalip ingerlajuaannarnissaa qulakkeerniarlutigu neriuppugut suliffeqarfissi aningaasatigut tapersiisinnaasoq, taamaasilluta suleqatigiinnitsigut illoqarfipput kusanartumik avammut nittarsaatissagaluarparput.

Suleqatigiinnitsigummi illoqarfipput avataaniit aasaanerani tikerarneqarnerulernissaa angusinnaagutsigu tamatsinnut nuannersuussaaq. Soorlu kalaalerpassuit 1.augustimi Københavnimi Tivolimut peqataajartortarnerattut ittumik Sisimiunukartiitalersinnaagutsigit torrallaassaagut.

Aasaq manna Sisimiut Festival pilersaarutigaarput 4.-5.august ingerlanneqarnissaa.

Saaffissat: Malik Berthelsen, tlf. 52 55 00, Johannes Ujo Müller, tlf. 48 59 33